Ávjovári mánáidsuodjalusbálvalus
Ávjovári mánáidsuodjalusbálvalus lea Kárášjoga gieldda ja Guovdageainnu suohkana oktasaš bálvalus.
Min bargu lea veahkehit ja suodjalit mánáid ja nuoraid geat ellet dearvvasvuođa ja ahtanuššamii čuohci diliin. Mánát ja bearrašat galget oažžut veahki áiggil ja vuostáváldojuvvot dorvvolašvuođain, ráhkesvuođain ja ipmárdusain. Ulbmil lea váikkuhit buori ja dorvvolaš bajásšaddamii.
Mo sáhttit mii veahkehit?
Mánáidsuodjalusa ovddasvástádus lea:
- rávvet ja bagadit mánáid, nuoraid ja váhnemiid
- geahčadit vuorjamušdieđuid ja dárkkistit máná fuolahusdili
- árvvoštallat veahkkedárbbu ja álggahit ja gozihit doaibmabijuid
- dahkat mearrádusaid mánáidsuodjaluslága vuođul
- ráhkkanahttit áššiid mánáidsuodjalussii ja dearvvasvuođalávdegoddái
- bearráigeahččat mánáid geat orrot biebmoruovttuin dahje ásahusain ja sin váhnemiid
Máná várás ja mielváikkuheapmi
Min bargu lea čađat máná várás. Mánáide galget dieđut ja vejolašvuođat cealkit oaiviliiddiset diliide mat gustojit sidjiide.
Sámegiella ja -kultuvra
Min bargu lea deaividit mánáid ja bearrašiid sámegiel, -kultuvrra ja servodateallinipmárdusain. Sámi mánáid giella, kultuvrralaš gullevašvuohta ja gullevašvuohta muđuid galgá áimmahuššojuvvot čađat áššis, maiddái doaibmabijuidválljemis ja –čuovvuleamis.
Mii deattuhat ovttasbarggu mánáin, váhnemiiguin, máná bearrašiin ja fierpmádagain. Mánát ja bearrašat galget sáhttit hállat iežaset gillii ja adnojuvvot árvvus duogáža ja vásáhusaidis olis.
Váldde oktavuođa ráđđádallamii ja veahkkái
Váhnendilli sáhttá leat gáibideaddji, ja buot bearrašat vedjet vásihit váddásat áigodagaid. Jus fal leat váddásat eallindilis ja dárbbašat doarjaga áimmahuššat mánát, ávžžuhat mii váldit minguin oktavuođa.
Dus ii leat dárbu diehtit masa dárbbašivččet veahki go minguin válddát oktavuođa. Mii sáhttit ovttas háleštit dilis ja árvvoštallat guđe lágan veahki doai mánáinat dárbbašivččiide.