Diehtojuohkinčoahkkin iešgearggusvuođa birra

Kárášjoga gielda bovde rabas álbmotčoahkkimii álbmoga iešgearggusvuođa birra. Álbmotčoahkkin lea Servodatviesus 12.11.26 tii. 18:00 – 19:30

Válmmasvuohta vuorddekeahtes dáhpáhusaide lea iešgearggusvuođa guovddážis. Go eanet olbmot sáhttet hálddašit iežas dárbbuid ja veahkehit earáid heahtedilis, nannejuvvo servodaga ollislaš birgennákca.

Ovdamearkkat heahtediliin:

  • Guhkilmas čáhcevátnivuohta váldofierpmádatváttu geažil.
  • Máŋgga beaivásaš elrávdnjeboatkka fápmolinnjá vahágahttima maŋŋá. 
  • Mobiilaneahta, interneahta ja máksinvuogádagaid eret gáhččan cyberfalleheami geažil. 
  • Giddejuvvon geainnut ja fievrridanhástalusat gárra dálkkiid geažil.
  • Gohččun bissut siste atomalihkohisvuođa maŋŋá. 

Dákkár dáhpáhusat sáhttet dagahit stuorra váikkuhusaid, ja buorre gearggusvuohta deattuhuvvo daid beaktilit čoavdimis. 

Leage gearggus vuorddekeahtes dáhpáhusaide

Buorre iešgearggusvuohta mearkkaša ahte don ja du lagamusat lehpet bures ráhkkanan birget gaskaneattet heahtedili vuosttas beivviid. Dat álgá das ahte árvvoštalat mo iešguđege heahtedilli váikkuha iežat árgabeaivái ja makkár doaimmaid sáhtát álggahit duhtadan dihtii vuođđodárbbuid, nugo borramuša, čázi, lieggasa ja gulahallama.  

Norgga eiseválddit ávžžuhit eatnasiid leat ráhkkanan birget iehčanassii ovtta vahku. Heahtedilis heahtebálvalusat vuoruhit sin, geat dárbbašit veahki eanemusat, ja mađi eanebut birgejit ieža, dađi buoret doaibmá servodat.