Sámediggi almmuha ruhtadoarjaga doaimmaide, doaluide ja prošeavttaide mat lágiduvvojit Giellavahku oktavuođas, 43. vahkus: 20.-26.10.2025. Mihttun lea čalmmustahttit sámegiela ja loktet sámegielaid atnima.
Prošeavttat sáhttet ovdamearkka dihtii: 1) aktivitehtat/deaivvadeamit hárjehallat giela, 2) rabas dáidda- ja kultureahket, mas luohti ja lávlun, dahje diktalohkan, máinnasteapmi ja eará lávdedáidda sámegillii, 3) čájáhus7logaldallan sámi giela, kultuvrra ja (báikkálaš) historjjá birra, 4) háleštallan dihto fáttás, fágasániin ja -tearpmain, 5) sámegiel sániid ja dadjanvugiid plakáhta/seaidnečikŋa.
Kárenaš Sámi giella- ja kulturguovddáš almmuhii ja doalai rabas čoahkkima geassemánus gos bohte ovdan buorit árvalusat, maiddái ovttasbargoprošeavttaide, ja das mii leat hui giitevaččat.
"Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Aiddo dán vahkus galget sámegielat gullot ja oidnot juohke sajis." (Sámediggi)
Kárenaš ávžžuha lágideddjiid geat fállet rabas doaluid Giellavahku oktavuođas, váldit oktavuođa minguin. Golggotmánu gaskamuttus almmuhit Kárášjoga Giellavahku prográmma, ja háliidat ahte du/din doalut ja doaimmatge oidnojit. Muittuhat ahte lágideaddjin buori áiggis ovdal Giellavahku almmuhat iežat doaluid Sámedikki prográmmasiidui dás
“Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusaid, ealáhusaid, organisašuvnnaid ja eará aktevrraid bovdet oainnusmahttit sámegielaid aiddo dán vahkus. Ovttas váldit stuorábuš ovddasvástádusa sámegielaid gullomis, oidnomis ja atnimis buot servodatsurggiin.” (Sámediggi)
Kárenaš giellaguovddážis gulahallanolmmoš: gudrun.eriksen.lindi@karasjok.kommune.no
Giellavahku birra logat eanet dás
Govva: Kárenaš Sámi Giella- ja kulturguovddáš ovttasbarggai Kárášjoga Juoigan ja Neaktin-servviin ja Scandic hoteallain Giellavahkus 2024 lágidit doaluid mánáiguin ja mánáide Stuorragoađis. Ovttasbarggu gánnáha! Govven: Gudrun E Lindi.
