Ráidu lea báddejuvvon Kárášjogas mas soames báikkálaš neavttára leat beassan neaktit – máŋgasis lea duogáš Kárášjoga kulturskuvllas. Dat ahte nuorra taleanttat min iežamet gielddas dál mearkkašuvvojit máilmmiviidosaš lávddis, deavdá min hirbmat rámisvuođain.

– Sátnejođiheaddjin lean vuosttažettiin hirbmat rámis ja hirpmástuvvan go ráidu, ja Kárášjohka, oažžu dákkár fuomášumi. Dát lea midjiide historjjálaš dáhpáhus, dadjá sátnejođiheaddji Britt Øvregård.

“Oro jaska/ Hold kjeft/ Shut up” lea čuohcci ja roahkkadis muitalus sámi nuoraid birrasis. Ráidu gieđahallá váttes fáttáid dego veagalváldima, vealaheami, homofobiija ja gáibideaddji jávohisvuođakultuvrra – dakkáraš fámuin ja duohtavuođain mii guoská guhkkelii ja viidábut go dušše Sápmái.

Dat ahte Kárášjoga Sámi ráidu olaha gitta Emmy-evttohussan, lea hirbmat olahus olles min báikkálaš servodahkii, sámegillii ja kultuvrii, ja nuorra filbmadahkkiide geat dustet muitalit daid deaŧalamos muitalusaid.

Kárášjohka illosa – ja mii sávvat lihku didjiide olles New York mátkái!

Lassi dieđuid oaččut:

Evttohaslista – Riikkaidgaskasaš Emmy-bálkkašupmi

Ráidu NRK TV:s