Kárášjoga birra

Ovddeš dálveorohat Ávjovárri, su. 4 miilla Kárášjoga oarjjabealde, lea rievdan ođđaáigásaš servodahkan Kárášjohka. Jagis 1866 šattai Kárášjohka sierra gieldan ja 1872:s sierra girkosuohkanin. 

Dehálaš ealáhusat leat ee. boazodoallu ja eanadoallu lassin meahcceealáhusaide nugo meahcásteapmi ja guolásteapmi. Boazodoallu lea leamaš guovddážis ovdáneamis doloža bivdoservodagas. Eanadoallu vuhtto gitta 16.-17. čuohtejagi rájes, ja ođđaset historjjás lea maiddái eanadoallu mearkkašan ollu. Kárášjohkalaččat leat álo doaimmahan ealáhusaideaset riikkarájáid rastá. Eanaš bargit gielddas leat bálvalusealáhusain (almmolaš hálddahusain, bálvalusain jna.). 

Guovddáš sámi ásahusat, nugo Sámediggi, NRK Sápmi, RiddoDuottar Museat - Sámiid Vuorká-Dávvirat, Sámi spesialistadoavtterguovddáš, Sámi Dáiddaguovddáš, Sis-Finnmárkku proavásgoddi, Sámi sierrabibliotehka, Sámi našuvnnalaš gealboguovddáš – psyhkalaš dearvvasvuođasuodjalus leat ásahuvvon gildii. Dát ásahusat ovddastit viiddis akademalaš birrasa, mat dagahit Kárášjoga miellagiddevažžan ássan- ja bargobáikin. Kárášjogas maid ahtanušahat dearvvašvuođa- ja sosiálabálvalusaid ja áigumuš lea dahkat riikkadoaimma sámi divššohasaid várás ee. sierra sámi veajuidahttinjoavkkuin.

Gielddas leat ealli kulturdoaimmat, mas leat dakkár fálaldagat go valáštallan- ja olgostallandoaimmat, kultuvra, mánáid- ja nuoraiddoaimmat, dáidda, musihkka ja eará. Kárášjoga gieldda kulturskuvllas leat fálaldagat musihkas, sárgumis/ njuohtamis/ bálseduojis ja duojis muđuige, dánsumis/ lihkadeamis. Gildii lea maid ásahuvvon sierra jietnastudio. Gielda lea maid beaggigoahtán jahkásaš kulturfestivála geažil, mii lágiduvvo beassášvahkus girjás ja miellagiddevaš prográmmain. 

Kárášjogas leat maid erenomáš olgostallandoaimmat; Máilmmi buoremus luossajogat, rievssat/ ealgabivdu, rutnisoaggun ja dáppe leat flora- ja faunavalljodat ja valjis luondduriggodagat. 

Jus hálida juoidá álggahit Kárášjogas, de leat mis gárvves huksensajit ja máŋggalágan ealáhusásahusat. Mis leat maiddái buorit skuvlafálaldagat - ja doarvái mánáidgárdesajit. Buorre ovdun lea maiddái min geográfalaš sajádat.