Ráhkis ássit ja ustibat, 
Lihkku beivviin!
 

Odne mii čoagganat ávvudit beaivvi mii lea daid dehálamos beivviid gaskkas jagis, Sámi álbmot beaivvi, guovvamánu 6. beaivve. Dán beaivvi leat mii rápmásat, dát lea oktavuođabeaivi ja maiddái beaivi goas mii muittašat historjámet. 
 

Guovvamánu 6. beaivve 1917 Elsa Laula Renberg hoidii dan vuosttas Sámi riikkačoahkkima, mii dollojuvvui Metodistagirkus Troanddimis. Dalle lei vuosttas geardde go sápmelaččat čoagganedje riikkaidgaskasaččat bargat oktasaš áššiiguin .

Áššit dalle ledje areála, vuoigatvuođat ja skuvlavázzin. Ja odne, badjel čuohte jagi maŋŋá – leat dat fáttát ain seamma áigeguovdil.

Mun álggahan vuos rámidit ahtanuššama dáppe Kárášjogas. Guovtte jagi geahčen mis lea ođđa skuvla, ja dearvvasvuođaguovddáš báikegotti guovddážis. Dat leat stuorra, dehálaš ja boahtteáigásaš visttit mat gártet buorrin min mánáide, nuoraide ja maiddái boarrásiidda.
 

Dál lea badjelaš vahkku go mii gallestalaimet Ohcejoga gieldda nannen dihtii rájáidgaskasaš ovttasbarggu. Guovddážis ságastallamis lei kultuvra ja skuvla, ja čoahkkin muittuhii čielgasit man dehálaš rájáidgaskasaš ovttasbargu lea Sámis.
 

Mun maiddái ferten namahit daid stuorrá sisabáhkkenašiid mat hástalit min Finnmárkkus. Dat eai guoskka dušše Muolkkuide. Dat guoská maid elfápmolinnjáide, bieggafápmui ja eará stuorra eanabilidemiide. Dákkáraš huksemat čuhcet issorasat lundui, boazodollui ja Sámi servodahkii.

Máilbmi vásihuvvo dál dorvvuheabbon ja eahpediehttevažžan. Servodatlaččat mii fertet leat ráhkkanan garrasat diliide, maiddái duođalat roassodiliide.

Mii maiddái eat sáhte vajáldahttit dálkkádatrievdadusaid mat maid čuhcet lundui ja eallingeardái. 

Hástalusaid gaskkas čielggiha maid - man dehálaš lea atnit fuola sámevuođas. Sátnejođiheaddjin mun lean erenomáš rámis go Kárášjohka lea nu dehálaš  sámegillii, kultuvrrii ja servodateallimii. Sámegiella lea dáppe ealli giella, mis lea nana kultuvra, ja dat vierut čuvvot mánáid ja nuoraid. Dat lea nanusvuohta ja ovddasvástádus maid mii fertet áimmahuššat, ja mainna leat rápmásat. 

Danne lea dehálaš odne čoagganit ja ávvudit, loktet ja nanusmahttit Sámi oktasašvuođa.
 

Loahpalaččat mun dáhtun giitit buohkaid geat leat váikkuhan otná ávvudeapmái!

Dáid sániiguin mun giittán fuomášumis ja sávan didjiide ilolaš Sámi álbmotbeaivvi ávvudeami.

Lihkku sámi álbmotbeaivviin!