Dát artihkal Ságat-áviissas  Runar Samuelsen ja Margrethe Sakshaug birra Karasjok Motorklubbas ja IL Nordlysas guoskkaha juoga hui vuđolačča mis. Valáštallanmovtta, nákcema, dorvvolaš deaivvadansajiid ja mánáid ja nuoraid ealli doaimmaid duogábealde leat mearehis olu eaktodáhtolaš bargotiimmut. Dávjá daid moadde seamma bargiid, jagis jahkái.

Juovlabásáris IL Nordlys nammadii Heidi Boine jagáš buollisearran spáppačiekčamis. Dat lea bures ánssášuvvon dovddastus árjja ovddas gili mánáid, nuoraid ja rávisolbmuid illun. Čuoigama ja láhttobargguid jagáš bálkkašumi oaččui Lasse Østmo, gean mii dovdat almmájin guhte fuolaha ahte čuoiganláhtut leat dulbmojuvvon ja gárvásat go dálvá.   

Runar Samuelsen, Margrethe Sakshaug, Heidi Boine ja Lasse Østmo ovddastit sin, geat váldet ovddasvástádusa go bargu galgá dahkkojuvvot. Sii eat daga dan rámi dihtii, muhto danin go sii dihtet man dehálaš valáštallan ja eaktodáhtolašvuohta lea gullevašvuhtii ja ássanmoktii Kárášjogas. Dákkár árjja haga min gilli livččii geafit báiki.   

Sátnejođiheaddjin mun dáhtun cealkit stuorra giitosa buot eaktodáhtolaččaide, geat barget valáštallamis, kultuvrras ja joavkkuin ja servviin. Gielda berre doarjut eaktodáhtolašvuođa, ja mun illudan go sihke KMK ja IL Nordlys vásihit dan. Muhto gielda ii okto sáhte buhtadit beroštumi, eaktodáhtolaš vuoiŋŋa ja ovddasvástádusa. Dat ferte boahtit mis, geat ássat dáppe.    

Dál go mii álggahat ođđa jagi, mun doaivvun ahte eambbogat dovdet movtta searvat. Leš dal hárjeheaddjin, stivralahttun, eaktodáhtolaš bargin dahje veahkeheaddjin. Ii oktage nagot visot, muhto juohkehaš sáhttá bargat vehá. Dan láhkai mii duddjot doaimmaid, gullevašvuođa ja jáhku boahtteáigái Kárášjogas. 

Dáinna sávan buohkaide hui buorre ođđa jagi, ja stuorra giitosa buohkaide geat leat mielde ovddideamen searvevuohtamet!

Dearvvuođaiguin
Kjell Olav Guttorm 
Sátnejođiheaddji