Ovdagoddečoahkkin 
Álgovahkus jođihin vuosttas háve ovdagoddečoahkkima. Mis lei buorre ja konstruktiiva čoahkkin, gos mii meannudeimmet olu áššiid. Guokte daid deháleamos áššiin, maid meannudeimmet, ledje opmodatvearu čielggadeapmi ja 2026 bušeahtta ja doaibmaplána. Guktot áššit bohciidahtte buori ságastallama ja ovdagoddi mearridii áššeguottus juovlamánu 11. beaivvi gielddastivračoahkkimii. Ovdagoddečoahkkima áššebáhpárat ja čoahkkinbeavdegirji gávdno dás. 

Finnmárkoáimmahušši 
Gaskavahku ja duorastaga ledjen Álttás, gos serven Finnmárkoáimmahušši – fátmmasteaddji boahtteáigi seminárii. Dat lei hui movttiidahtti seminára, gos bođii ovdan olu positivitehta ja optimisma Finnmárkku boahtteáigái. Mii gulaimet earret eará máŋga fiinna muitalusa ja ovdanbuktima iešguđege báikkiin Finnmárkkus. Mun dáhtun maiddá máinnašit, ahte nuoraidpanela buvttii erenomáš bures ovdan iežas sáni. Vulobealde oaidnibehtet muhtin govaid konferánssas. Prográmma gávdno dás.

Sátnejođiheaddjičoahkkin Guovdageainnuin, Deanuin ja Unjárggain 
Bearjadaga mis lei čoahkkin sámi giellaovdánahttingielddaid (Kárášjohka, Guovdageaidnu, Deatnu ja Unjárga) sátnejođiheddjiiguin.Doppe mii ságastalaimet sámi digitaliseremis, dehálašvuođas oažžut investerenkapitála Sápmi investii ja sámi guovttegielatvuođagaskaomiin. Dat lei mu vuosttas čoahkkin dán ovttasbarggu olis ja mun illudan joatkit buori ovttasbarggu sámi guovddášguovlluin.     

Ealáhusávvodoalut 
Lávvardaga serven ealáhusávvodoaluide dáppe Kárášjogas. Doppe dollen sáhkavuoru, mas deattuhin dehálašvuođa ealáhusdoaimmaid ja gieldda gaskasaš buori ovttasbargui. Oahpásmuvven maid ođđa olbmuiguin ja mis ledje olu buorit ságastallamat ealáhusovdánahttimis Kárášjogas. Lea hui buorre oaidnit ahte mis lea ealáhussearvi, mii ráhkada doaimmaid gilis. Mun lean maid ilus go ealáhussearvi dáhttu buori ovttasbarggu gielddain. 

Dákko bokte sávan adveantaáiggi ja  juovlabasiid bures boahtin!

Dearvvuođaiguin
Kjell Olav Guttorm 
Sátnejođiheaddji