Luossačoahkkin Porsáŋggus
Mun leamaš mielde Sámedikki ja Dálkkádat- ja birasdepartemeantta (KLD) luossačoahkkimis Leavnnjas, mii lágiduvvui sámi luossabivdokultuvrra seailluheami gulaskuddama olis.
Kárášjoga stággobivdosearvi doalai buori sáhkavuoru Kárášjoga luossabivddus. Beasaimet gullat mo leat bivdán áiggiid čađa bajit oalgejogain Kárášjogas ja Iešjogas. Oinniimet ealligovaid, mat govvidedje johkasámiid fanaskultuvrra dáppe badjin. Searvi muitalii maiddá, man dehálaš lea jierpmálaččat ealáskahttit luossanáliid Deanu čázádagas.
Iežan sáhkavuorus deattuhin luossabivddu ja johkasámiid kultuvrra dehálašvuođa iežamet identitehtii. Muitalin maiddá man dehálačča doaimmat mánáide ja nuoraide leat, almmá árbedieđu sirdima haga sidjiide kultuvrra ii leat vejolaš seailluhit.
Dá lea Sámedikki ja KLD gulaskuddan. Gielddastivračoahkkimis juovlamánus 2025 mearriduvvui Kárášjoga gieldda gulaskuddancealkámuš.
Čoahkkin FeFoin
Várresátnejođiheaddji, gielddadirektevra, teknalaš ovttadaga jođiheaddji ja mun čoahkkinasttiimet Finnmárkkuopmodagain (FeFo) Anárjohgeainnu divodeami olis. Šiehtadeimmet geassemánu álggus fitnat ovttas geahčadeamen, vai oažžut divodandárbbuide oktasaš oainnu. Lassin mii ságaškušaimet FeFo eaiggádan areálaid birra báikeguovddážis.
Mis lei hui buorre ja produktiiva čoahkkin.
Čoahkkin Sámedikkiin mohtorjohtolatlága birra
Ávjovári IPR lea čoahkkinastán Sámediggeráđđelahtuin Jon-Christer Mudeniain mohtorjohtolatlága birra. Doppe válddaheimmet oktasaš hástalusaideamet dálá lága ja NOU 2024:10 ektui. Attiimet maid árvalusa maid galgat dahkat, vai ođđa mohtorjohtolatláhka heivešii buorebut kultuvraseamet ja eallinvuohkáseamet.
Boahtte vahkus leat Sámedikkis konsultašuvnnat ođđa lága birra Dálkkádat- ja birasdepartemeantta stáhtačálli Kristoffer Hanseniin. Ja mun jáhkán min árvalusaid leat ávkkálačča.
Rabas beaivi Sámi joatkkaskuvllas Kárášjogas
Moai gielddadirektevrrain galledeimme Rabas beaivvi Sámi joatkkaskuvllas Kárášjogas. Lei ilolaš deaivvadeapmi skuvllain, man ieš lean vázzán. Doaibmi rektor oahpistii munno ja deaivvadeimme skuvlla bargiiguin ja oahppiiguin. Mun ožžon dieđuid earret eará dan birra, ahte joavkojohtolatfálaldagat Detnui, Guovdageidnui ja eará gielddaide Finnmárkkus eai leat heivehuvvon oahppiid dárbbuide. Dán mun ovddidan, go mii boahtteáiggis addit cealkámušaid joavkojohtolatfálaldaga birra Finnmárkkus.
Seminára bieggafápmoproseassaid birra Finnmárkkus
Mun oassálasten Sámedikki, NRL ja Gávcci seminárii Sámedikkis plána- ja energiijakonsešuvdnaproseassaid Birra Finnmárkkus, mii dál lea jođus. Dat lei hui buorre ja čuvgejeaddji seminára plánaid ja konsešuvnnaid gaskasaš dili birra. Ja eandalit dat man dehálačča buorit proseassat leat váttis areálaáššiin.
Illun lei maid oaidnit ahte Davvinjárgga sátnejođiheaddji lei maid mielde.
Prográmma gávdno dás.
Báikeservodatkonferánsa
Mun leamaš maiddá Báikeservodatkonferánssas Gardermoenis. Doppe fáddán lei earret eará gielddaid gáržžes ruhtadilli ja báikkálaš areálahálddašeapmi. Areálahálddašeapmi lea hui dehálaš fáddá stuorra meahccegildii, nugo Kárášjohka.
Prográmma gávdno dás.
Dáinna sávan buohkaide rivttes buorre vahkkoloahpa!
Dearvvuođaiguin
Kjell Olav Guttorm
Sátnejođiheaddji