Dán vahkus mii searvvaimet KS Sámi fierpmádaga čoahkkaneapmái Gironis. Doppe ožžon vejolašvuođa juogadit Kárášjoga gieldda vásáhusaid mo leamaš leat Sámi giellahálddašanguovlun. Maiddá min gielddadirektevra Rune Fjellheim doalai gelddolaš sáhkavuoru dan birra mo koanstajierpmi sáhttá ávkkástallat sámegiela ovdánahttinbarggus.  

Čoahkkaneamis beasaimet earret eará oahppat eanet Girona gieldda birra. Mii gulaimet mo ruvkedoaibma váikkuha báikkálaš servodahkii, sámeorohagaide ja boazodollui, juoga mii čuozai sakka munnje. Mii beasaimet gullat maiddá olles gávpoga sirdimii čatnon hástalusain.   

Mii leat  beassan gullat gelddolaš sáhkavuoruid Sámiráđis, Ruoŧa sámedikkis, Gielda- ja guovlodepartemeanttas, Demokratiija- ja stivrenossodagas, Ubmi ja Bihtán sámiid ovttasbarggus ja UIT:s / Sámi allaskuvllas. 

Mis ledje buorit ságastallamat sihke Norgga ja Ruoŧa beale rájá duohtavuođa- ja soabahankommišuvnna barggu birra, ja makkár vuordámušat mis leat dán dehálaš barggu čuovvoleapmái. Dasa lassin mii beasaimet juogadit mávssolaš vásáhusaid das, mo mii bargat sámegielaid nannemiin Norgga ja Ruoŧa bealde rájá.

Dearvvuođaiguin
Kjell Olav Guttorm
Sátnejođiheaddji