Vuossárggas gaskavahkkui ledjen mielde KS Sámi fierpmádaga čoahkkaneamis Gironis. Eanet dán čoahkkaneami birra gávdno dás.

Duorastaga lei mis gieldda hálddahuslávdegotti čoahkkin. Doppe mii meannudeimmet guokte ášši; virgelohpenjuolggadusaid ođasmahttima ja dieđihanrutiinnaid ođasmahttima. Seamma beaivvi ledjen maid Guovdageainnu suohkana sátnejođiheddjiin (Ávjovári IPR) čoahkkimis Sámi allaskuvlla rektoriin, gos sagastalaimet earret eará stáhtabušeahta 2026. Dasa lassin čoahkkinasten Paul Eric Aspholmain (NIBIO), Elida Langsteinain (Næring og Rovvilt) ja Jan Helmer Olseniin Kárášjoga guovžamáddodagas. Doppe sagastalaimet olu guovžamáddodaga lassáneapmái guoskevaš hástalusain.   

Odne (bearjadaga) mu beaivi álggii Sápmi ealáhusgárddi ja min báikkálaš ealáhussearvvi lágidan ealáhusdoaimmaid iđitborramušain. Dat lei hui fiinna vuolggaheapmi ja lei buorre oaidnit ahte ealáhusa bealde leat doaimmat. Dan maŋŋá galledin dearvvasvuođa ja fuolahusovttadaga, vai bessen oahpásmuvvat buorebut dan bargosadjái ja bálvalusaide, maid gielda doppe fállá. Beaivi loahpahuvvui čoahkkimiin searvegodderáđiin, gos váldofáddán lei stáhtabušeahtta 2026.

Dákko bokte sávan buohkaide hui buorre vahkkoloahpa!